पर्वत : “दीर्घायूको युगः दीर्घ जीवनका लागि जीवन पद्धतिमा पुनर्विचार गरौँ” भन्ने नाराका साथ अन्तर्राष्ट्रिय ज्येष्ठ नागरिक दिवस २०२६ विभिन्न कार्यक्रम गरी मनाइएको छ।
दिवसको अवसरमा गण्डकी प्रदेश सरकारको एकीकृत सेवा कार्यालय, पर्वतले मोदीबेनी धार्मिक स्थलमा रहेका ज्येष्ठ नागरिकसँग अन्तरक्रिया तथा न्यानो माया वितरण कार्यक्रम सम्पन्न गरेको छ। कार्यक्रममा ज्येष्ठ नागरिकलाई फलफूल तथा ब्लाङ्केट वितरण गरिएको थियो।
कार्यक्रममा कार्यालय प्रमुख जीवन पौडेलले ज्येष्ठ नागरिकलाई सहज, मर्यादित र सम्मानपूर्ण जीवनयापनका लागि आवश्यक सहयोग र संरक्षण गर्नुपर्ने बताए। उनले ज्येष्ठ नागरिक राष्ट्रका अमूल्य सम्पत्ति भएकाले उनीहरूको ज्ञान, सीप र जीवन अनुभवलाई नयाँ पुस्ताले अनुसरण गर्नुपर्नेमा जोड दिए।
पौडेलले ज्येष्ठ नागरिकको सामाजिक सुरक्षा, सम्मान र संरक्षणलाई थप प्रभावकारी बनाउन परिवार, समुदाय तथा राज्यका सबै पक्षको सहकार्य आवश्यक रहेको बताए।
मोदीबेनीका ज्येष्ठ नागरिकसँग अन्तरक्रिया तथा न्यानो माया वितरण
अशोज १६, २०८३
