पर्वत : गत भदौ २३ गते जेनजी समूहको प्रदर्शनको क्रममा घाइते भई उपचाररत २८ वर्ष मुनिको जेनजी पुस्ताका लागि पर्वतमा रक्तदान कार्यक्रम सम्पन्न भएको छ ।
प्रहरीको तीब्र दमनका क्रममा गोली लागेका तथा लाठी चार्जबाट घाइते भई काठमाडौंका बिभिन्न अस्पतालहरुमा उपचाररत युवाहरुलाई रगतको अभाव भएपछि पर्वत जेसिजले रक्तदान कार्यक्रमको आयोजना गरेको हो । कुश्माको लोकतान्त्रिचोकमा आयोजना भएको रक्तदान कार्यक्रममा ३० जना भन्दा बढीले रक्तदान गरेका छन् । उक्त रगत रक्तसञ्चार केन्द्र पर्वत हुँदै पोखरा गएको र त्यहाँबाट आवश्यकता अनुसार देशका अन्य ठाउँमा जाने पर्वत जेसीजका अध्यक्ष अच्युत पौडेलले बताउनुभयो ।
देशमा भ्रष्टाचारको अन्त्य हुनुपर्छ, राज्य सञ्चालन गर्नेहरुले युवाका आवाज सुन्नुपर्छ भनेर आन्दोलन गर्दा उनीहरुमाथि नै प्रहरीको दमन थियो । एकै दिनमा १९ जना विद्यार्थीहरुको मृत्यू हुने गरी भएको आन्दोलनका क्रममा सयौँ जना विद्यार्थीहरु घाइते अवस्थामा छन् । सामाजिक सञ्जालहरुमा काठमाडौंमा उपचाररत विद्यार्थीहरुलाई रगतको अभाव भएका पोस्टहरु देखिन थालेपछि पर्वत जेसीजले रक्तदान कार्यक्रमको आयोजना गरेको पर्वत जेसीजका अध्यक्ष अच्युत पौडेलले बताए । जेन जी आन्दोलनले देश तातिरहेको बेलामा, युवाहरु आन्दोलनमा होमिएको बेलामा रक्त बैंकहरु खाली हुन थालेपछि उपचारमा थोरै भए पनि सघाउन रक्तदान कार्यक्रमको आयोजना भएको पौडेलको भनाई छ ।
कोही एक व्यक्तिको रगतले देशका लड्ने कोही युवाको भविष्य बचाउन र रोईरहेकी कोही आमाको आसु थाम्नका लागि रक्तदान र्काक्रमले सहयोग गरेको छ । पर्वत जेसीजले घटनाले शासकीय संवेदनशीलताको गम्भीर अभाव प्रष्ट्याएको र यसले नागरिक माझ असन्तोष र अविश्वास बढाएको विज्ञप्तीमार्फत बताएको छ । युवाहरूले उठाएका प्रश्न र मागहरू केवल राजनीतिक मुद्दा मात्र नभएर न्याय, समानता र सुशासनको आधारभूत आवाज समेत भएको विज्ञप्तीमा उल्लेख छ ।
