संजय रेग्मी
पुस १४, २०८०
पर्वत : गण्डकी प्रदेश स्तरीय प्रतिभा पहिचान कार्यक्रमको लागि पर्वतबाट जाने शिक्षक र विद्यार्थीको छनोट पूरा भएको छ ।
जिल्लाका सात वटा पालिकाहरूमा शिक्षक तथा विद्यार्थीको लागि आयोजना गरिएका वक्तृत्वकला र नृत्य प्रतियोगिताका आयोजना गरेपछि उनीहरूलाई जिल्ला स्तरमा शनिवार प्रतिस्पर्धा गराएर प्रतिस्पर्धीहरूको टुङ्गो लगाइएको सामाजिक विकास कार्यालय पर्वतकी प्रमुख मुना अधिकारीले बताइन् ।
फरक फरक चार विधामा भएका प्रतिस्पर्धामा प्रथम स्थानमा आएकाहरू प्रदेश स्तरमा आयोजना हुने ‘शिक्षक तथा विद्यार्थी प्रतिभा पहिचान तथा प्रोत्साहन पुरस्कार’ कार्यक्रममा अन्य १० जिल्लाका सहभागीहरूसँग प्रतिस्पर्धा गर्ने छन् । पुस २० गतेभित्रमा जिल्लाका प्रतियोगिताहरू सकेर प्रदेशमा पठाउनुपर्ने भनिए अनुसार शनिवार नै पर्वतका प्रतिस्पर्धीहरूको टुङ्गो लगाइएको हो । प्रतियोगितामा सामुदायिक र संस्थागत विद्यालयमा बाल विकास केन्द्रदेखि माध्यमिक तहसम्म स्थायी, अस्थायी, करार, राहत अनुदान कोटा र निजी स्रोतमा कार्यरत शिक्षक तथा विद्यार्थीहरू सहभागी हुन पाउँछन् ।
जसमा शिक्षकतर्फको वक्तृत्वकलामा राष्ट्रिय बाल शिक्षा सदन अङ्ग्रेजी आवासीय मा.वि.का सहायक प्रधानाध्यापक प्रकाश आचार्य प्रथम, पशुपति माध्यमिक विद्यालय राम्जाका शिक्षक कमल शर्मा तिमिल्सिना द्धितिय र जनता माध्यमिक विद्यालय फलेवासकी इन्दिरा तिवारी तृतीय भएका छन् । विद्यार्थीतर्फको वक्तृत्वकला प्रतियोगितामा नमुना अङ्ग्रेजी आवासीय माध्यमिक विद्यालय कुश्माकी निशा आचार्य प्रथम, जनकल्याण माध्यमिक विद्यालय बाच्छाकी अस्मिता क्षेत्री द्धितिय र नवजागृत माध्यमिक विद्यालय तिलाहारकी रोशनी बि.क तृतीय बनेका छन् ।
यस्तै शिक्षकतर्फको नृत्य प्रतियोगितामा मोदी गाउँपालिका प्रथम र कुश्मा नगरपालिका दोस्रो भएका छन् भने विद्यार्थी नृत्यतर्फ कुश्मा नगरपालिकाको नारायण माध्यमिक विद्यालय प्रथम, मोदी गाउँपालिकाको सरस्वती माध्यमिक विद्यालय द्धितिय र फलेवास नगरपालिकाको शिशु निकेतन विद्यालय तृतीय बनेका छन् । प्रतियोगितामा नृत्य र वक्तृत्वकलामा प्रथम बनेका समूहले नगद १०/१० हजार, द्धितिय बनेका समूहले ८/८ हजार र तृतीय बनेका समूहले नगद ६/६ हजार रुपैयाँ सहित प्रमाण पत्र पाएका छन् ।
वक्तृत्वकला अन्तर्गत विद्यार्थीका लागि ‘समावेशी सीपमूलक शिक्षा, स्वदेशमा युवा राष्ट्रको इच्छा’ शीर्षक राखिएको छ भने शिक्षकका लागि ‘म विद्यार्थीका लागि, विद्यार्थी मेरा लागि’ शीर्षक दिइएको छ । वक्तृत्वकलातर्फ जिल्लामा प्रथम बनेका शिक्षक र विद्यार्थीले आउँदो पुस २७ गते पोखरामा हुने वक्तृत्वकला प्रतियोगितामा भिड्ने छन् । यस्तै नृत्यतर्फ प्रथम बनेका शिक्षक र विद्यार्थीले पुस २८ मा पोखरामा नै हुने नृत्य प्रतियोगितामा प्रतिस्पर्धा गर्ने छन् । नृत्यमा २ देखि ६ जना सहभागी हुन पाउने तथा नृत्यका लागि प्रयोग भएको गीत सामाजिक, सांस्कृतिक र सन्देशमूलक हुनुपर्ने भनिएको छ । वक्तृत्वकलाका लागि ७ मिनेटको समय राखिएको छ ।
पोखरामा हुने वक्तृत्वकलामा प्रथम, द्धितिय र तृतीय बन्नेहरूले क्रमशः १५ हजार, १२ हजार र १० हजार रुपैयाँ तथा नृत्यतर्फ प्रथम, द्धितिय र तृतीय बन्नेहरूले क्रमशः २५ हजार, २० हजार र १५ हजार रुपैयाँ प्राप्त गर्ने छन् ।
प्रदेश स्तरीय प्रतिभा पहिचानका लागि पर्वतबाट छानिए शिक्षक र विद्यार्थी
